English
Chineseავიაკომპანია Geosky Airlines განაგრძობს ფლოტის სტაბილურ ზრდას და ოპერაციული შესაძლებლობების გაფართოებას. ავიაკომპანიის ფლოტს შეემატა ახალი Boeing 767-300F ტიპის სატვირთო საჰაერო ხომალდი, სარეგისტრაციო ნომრით 4L-GEF. ბორტი ამერიკის შეერთებული შტატებიდან უკვე საქართველოშია და ბაზირებულია თბილისის საერთაშორისო აეროპორტში.
ავიაკომპანია Geosky-მ ფლოტი 1 წლის განმავლობაში 4 ბოინგ 767-300F ტიპის სატვირთო საჰაერო ხომალდით გაზარდა, რაც კომპანიის სტრატეგიული განვითარების გეგმის თანმიმდევრული განხორციელების ნათელი მაგალითია.
ახალი Boeing 767-300F მრავალმხრივი შესაძლებლობების მქონე, მაღალეფექტური სატვირთო საჰაერო ხომალდია, რომელიც იდეალურია როგორც საშუალო, ასევე შორ მანძილზე გადაზიდვებისთვის. ფართო ფიუზელაჟისა და ტვირთის სათავსოს მახასიათებლების წყალობით, ის გამორჩეულად ეფექტურია არაგაბარიტული ან ტემპერატურისადმი მგრძნობიარე ტვირთის ტრანსპორტირებისათვის. თვითმფრინავის ტვირთის მაქსიმალური წონა შეადგენს 56.5 ტონას.
„რიგით მეოთხე ბოინგ 767-300F-ტიპის საჰაერო ხომალდის შემოსვლა ავიაკომპანიის ფლოტში წარმოადგენს კიდევ ერთ მნიშვნელოვან ნაბიჯს Geosky-ის განვითარების გზაზე და ხაზს უსვავს ჩვენს მომსახურებაზე არსებულ მზარდ მოთხოვნას. ჩვენ ვაგრძელებთ ფლოტის ზრდას და სერვისების მუდმივ გაუმჯობესებას, რათა მაქსიმალურად ეფექტურად ვუპასუხოთ საერთაშორისო ტვირთბრუნვის მზარდ საჭიროებებს,“ — აცხადებენ კომპანიაში.
Geosky Airlines-ის ფლოტის მუდმივი გაფართოება ხაზს უსვამს ავიაკომპანიის მიზანს — დარჩეს რეგიონში ყველაზე დინამიურად განვითარებად სატვირთო ავიაკომპანიად და განამტკიცოს საქართველოს პოზიცია გლობალურ სატრანსპორტო ქსელში.
შეგახსენებთ, რომ სატვირთო ავიაკომპანია Geosky დაარსებულია საქართველოში 2017 წელს და წარმატებით ოპერირებს საქართველოდან ევროპისა და აზიის მიმართულებით. 2025 წლის მაისში ავიაკომპანია Geosky Airlines-მა წარმატებით განაახლა IOSA-ს მიერ გაცემული სერტიფიკატი. Geosky სერტიფიცირებულია და წარმოადგენს IATA-ს წევრ ავიაკომპანიას.
